22 - 10 - 2023 II TUHAN DO SUSUZAN TOTOPOT Laja ’ i Kinoingan Momomolinta ’ ngaavi ’ doun tana ’, koponguasaan ngaavi’ id politik, i Cyrus toi’ i Caesar, nopo nga’ hoovon di Kinoingan do popointahang tokuudi’ dii kuasa’ om kopomolintaan - laja’ Disido om atag Disido montok do tinau’ tuhun. Nga’ migit noopo izioho’ dii kuasa’ dioho’ do toluu’ai no. Kopusaan dotokou nopo nga’ okonko’ miampai dioho’, nga’ miampai di Kinoingan ii sambaon dotokou id kapanaandakan diti. HOZOU KOSUANGAN Cf. Ps 16:6-8 Momohoou zou doid Diau; tu’ pointantu’ no do mokinongou- kozo Ko dogo’, Oi Kinoingan; poboohingo’ ino tohingo Nu doid dogo’; kinongoo’ o boos ngaavi’ ku. Tamangai zou no sabaagi do ii kaanangan-kozo do mato Nu; id dii tinggohungung do pahapa’ ngaavi’ Nu um ohigai zou. Ii Gloria in excelsis (Kobontugan doid di Kinoingan) booson. SAMBAYANG-TONIIBO-KOPONIMPUUNAN Oi Kinoingan tavakas-kozo poimpasi selajul, panaak no do tomoimo zikoi nodaa do poposudong do hizab za doid Diau do hizab om monompuan do ko-laja-an Nu id tinopot do ginavo. Maza’ di Tuhan za Jesus Kristus, Tanak Nu, ii - 2 - mamaamasi om momolinta’ miampai Diau id dii kopiisaan di Spiritu Tobitua, Kinoingan, montok sohiihinaid aiso kopupuson. S. Amen. PAMBASAAN KOISO’ Pambasaan mantad di profeta Isaiah 45:1.4-6 Ingkaa ka di Tuhan do moboos doid dii noumaan Dau’, doid di Cyrus, ii nigitan Disido o hongon vanan do popohusuk dii tinau’ ngaavi’ do id dumbangan Disido om momogohus do tavak ngaavi’ do laja’ ngaavi’, do monuung do tataangob tangagazo id dumbangan Disido do au’ nodii kaangob -angob po ii tataangob tangagazo dioho’: Iti nopo nga’ montok sabap di suupu Ku Jacob, do Israel ii nopihi’ Ku, do nokopomohoou Zou diau maza’ do ngaan nu, papataak do gaa’ sundung potuu do au’ ko kotutun Dogo’. Izou no i Tuhan, au’ abagahan; aiso i’ kinoingan suvai ko’ Izou. Sundung do au’ ko kotutun Dogo’, sindataan ku iziau do koiho no daa o tuhun ngaavi’ mantad dii hisaon gisom doid dii tonobon dii tadau do, suvai mantad ko’ Izou, saviavi’ do aiso. Ii boos di Tuhan. S. Kotohuadan doid di Kinoingan. - 3 - HOZOU KOSIMBAAN (HOZOU-KAPAAZAAN KO-95:1. 3-5. 7-10 S. V. 7) S. Onuai do kobontugan om kuasa’ i Tuhan. 1. Hozou do iso’ hozou kavavagu doid di Tuhan, hozou doid di Tuhan oi saviavi’ tana’. Pobooso’ doid di tinau’ ngaavi’ ii kobontugan Disido om koimazaan ngaavi’ Disido doid saviavi’ dii tuhun ngaavi’. (S) 2. I Tuhan nopo nga’ indama’ om mipadan do kaazaan, koonokan do id soibau do saviavi’ kinoingan ngaavi’; ii nopo kinoingan ngaavi’ dii kapil ngaavi’ nga’ aiso. I Tuhan no ii, ii minonoodo di tavan ngaavi’. (S) 3. Onuai i Tuhan, oi paganakan ngaavi’ kou do tuhun ngaavi’, onuai i Tuhan do kobontugan om kuasa’, onuai i Tuhan dii kobontugan dii ngaan Dau’. Pogovit do iso’ pataakon om sumuang no dii natad ngaavi’ Disido. (S) 4. Sambao’ no i Tuhan id panambazangan tagazo Disido. Oi tana’, padtalok no id dumbangan Disido. Paabalo’ doid di tinau’ ngaavi’: ‘Laja’ i Kinoingan.’ Mombisala’ i’ Isido dii tuhun ngaavi’ id aadang -tinuhid. (S) - 4 - PAMBASAAN KODUVO Pambasaan mantad dii suat koiso’ di Sangti Paul doid dii tuhun ngaavi do Thessalonika 1:1-5 Mantad di Paul, di Silvanus om di Timothy, kumaa’ doid di Eklizia id Thessalonika ii id Kinoingan ii Tama’ om di Tuhan Jesus Kristus; popobuzu doid diozu do grasia om pibabasan mantad di Kinoingan ii Tama ’ om di Tuhan Jesus Kristus. Tomoimo do oiton za iziozu do id sambayang ngaavi’ dagai om monongkotohuod di Kinoingan montok diozu saviavi’, om piondom -ondom id dumbangan di Kinoingan Tama’ dotokou do ingkuo kou do nokopopokito do kotumbazaan diozu do id koimaan, pinakalaja’ montok koginavaan om tuminoboi maza’ do kahansanan, id di Tuhan dotokou Jesus Kristus. Koiho zikoi, oi tobpinai ngaavi’, do guminavo diozu i Kinoingan om do nopihi’ kou, tu’ ontok nopo dii ovito’ dagai ii Abal Tavasi’ doid diozu, minikot ii doid diozu d o okonko’ sabaagi boos ngaavi’ noopo’, nga’ sabaagi kuasa’ om sabaagi do ii Spiritu Tobitua om sabaagi do kogompitan poimponu’ kozo Ii boos di Tuhan. S. Kotohuadan doid di Kinoingan. KAPAABALAN DII ABAL- TAVASI’ Jn 17:17 Alleluia, alleluia! Boos Nu nopo nga’ katapatan, Oi Tuhan, pohubuko zikoi no id dii katapatan. Alleluia! - 5 - toi’ Phil 2:15-16 Alleluia, alleluia! Mimang kou i’ babang do id pomogunan miaga do tombituon ngaavi’ tosindak sinikit tu’ manaak kou dii di boos do koposizon. Alleluia! ABAL- TAVASI’ Pambasaan mantad dii Abal- tavasi’ tobitua sinuat di Matthew 22:15-21 Minogidu’ ii Pharisee ngaavi’ do minooi pogiupaapakat do ingkuo monungkasip di Jesus do id nunu ii noboos Disido. Om pinougad dioho’ ii mokiki’ia’ ngaavi’ dioho’ doid Disido, songovian dii tuhun ngaavi’ di Herod, do moboos, ‘Oi Mongingia’, koiho zikoi do Iziau nopo nga’ tuhun totuhid om popo- ia’ dii lahan di Kinoingan do id lahan totuhid, om do au’ Ko oonok diisai - isai, tu’ gaa’ nopo do tuhun nga’ aiso i’ lati’ doid Diau. Dadi’, poihoo’ zikoi do pomusaavan Nu. Kavasa’ naku do papabalai do sukai doid di Caesar toi’ au’?’ Nga’ poingiho i Jesus dii taka dioho’ om suminim ba, ‘Oi mimpuupula’ kou ngaavi! Nookuo tu’ papataan kou do tungkasip diti montok dogo’? Pokitono’ Zou dii usin ii pambalai diozu dii sukai.’ Poombitai no dioho’ Disido o iso’ usin denarius om poboos no Isido, ‘Diisai do tuhu diti? Diisai do ngaan?’ ‘Di Caesar’ ka dioho’ do suminimba. Dadi’ minoboos Isido doid dioho’, ‘Vasi’ gia ino, pataako’ popoguhi’ doi d di Caesar ii nunu i Caesar o sanganu – om doid di Kinoingan ii nunu i Kinoingan o sanganu.’ - 6 - Ii Abal- tavasi’ di Tuhan. S. Kaazaan doid Diau, oi Tuhan za, Jesus Kristus. Booson ii ‘Otumbazaan zou’. SAMBAYANG DO ID DII TITAAK NGAAVI’ Panaak no dagai, oi Tuhan, sumambayang zikoi, do kapantangan totopot montok titaak ngaavi’ Nu, do, maza’ dii koimaan kopomohidang do grasia Nu, abaakasan zikoi nodaa dii mistirium ngaavi’ no kozo tompuanon za. Maza’ di Kristus Tuhan za. S. Amen. PREFACE KO-V DO DII TADAU- MINGGU’ NGAAVI’ ID TIMPU’ TOOMOD Kinopomongunan Totootopot do kotunud om otuhid iti, kalaja’ za om kopomasizan za, tomoimo om id-nombo-noopo do manaak Diau do koponongkotohuadan ngaavi’, oi Tuhan, Tama’ tobitua, Kinoingan tavakas-kozo om aiso-kopupuson. Tu’ pinaazu Nu ii pinosungkadan ngaavi’ di pomogunan om nokopoguhud dii kovohion ngaavi’ do timpu’ ngaavi’ om timpu- toun ngaavi’; nuug Nu o tuhun id kaagaaga Diau sondii’ om pinapaazat do kotuhunan id soibau di sompomogunan do id saviavi’ koimazaan dii, do momolinta’ id ngaan Nu do id - soibau do saviavi’ ii notoodo Nu om mangazou Diau sohiihinaid do id kalaja’ ngaavi’ Nu tindama’, maza’ di Kristus Tuhan za. - 7 - Om ingkaa no, miampai saviavi’ dii Tasab ngaavi’, mangazou zikoi Diau, tu’ id kalam azan toondos mangazou zikoi: Obitua, Obitua, Obitua.... HOZOU KOSOMBUTAN Cf. Ps 32:18-19 Biio’, ii mato di Tuhan nopo nga’ do id sontob dii oonok Disido, ii ahansan id koginavaan tobinsianan Disido, do manampasi do koduuduvo ngaavi’ dioho’ mantad kapatazon, do popotihombus dioho’ do poimpasi id pononhousan. toi’ Mk 10:45 Ii Tanak do Tuhun nokoikot do papataak do koposizon Dau’ sabaagi tobus montok togumu’. SAMBAYANG OPONGO KOSOMBUTAN Panaak no, Oi Tuhan, sumambayang zikoi, do, kaanu- kounalan mantad kaampaza n id konunu ngaavi’ doun - surga, asakadai zikoi nodaa do nunu ii taakon Nu id diti umulan baabaino om potounda’ montok dii titaak ngaavi’ ii selajul. Maza’ di Kristus Tuhan. S. Amen. - 8 - BALAKAT Ii balakat di Kinoingan tavakas-kozo, i Tama’, om i Tanak, om i Spiritu Tobitua, sumondot nodaa do id diozu om tumimpoon miampai diozu sohiihinaid. S. Amen.