23.01.2022 TADAU MINGGU’ KOTOHU ID TIMPU’ TOOMOD TOUN C II UNDANG-UNDANG DI TUHAN Tadau baino no ii tadau do munsikou do id undang-undang kavavagu ii nakataak di Kristus doid dotokou om ii popisompuu dotokou miampai Disido, ii popikagos dotokou sabaagi do tuhun ngaavi’ Dau’, om ii papakavasa’ dotokou do pakalaja’ songovian montok do kopomolintaan Dau’. Mokinongou tokou di boos ngaavi’ di undang-undang om soosoovon dotokou ngaavi’ ii do id ginavo dotokou. HOZOU KOSUANGAN Cf. Ps 95:1-6 Hozou no do hozou vagu doid di Tuhan; hozou no doid di Tuhan, oi saviavi’ i tana’. Id kotindapaan Dau’ o ko-laja-an om kogingahan, vinakas om kapantangan id tizonon tobitua Dau’. SAMBAYANG-TONIIBO-KOPONIMPUUNAN Oi Kinoingan tavakas-kozo poimpasi selajul, potunudo’ o koimaan ngaavi’ dagai pointanud doid kaanangan tavasi’ Nu, do id dii ngaan dii Tanak koginavaan Nu osimaan zikoi nodaa id kalaja’ ngaavi tangavasi’. Maza’ di Tuhan za Jesus Kristus, Tanak Nu, ii mamaamasi om momolinta’ miampai Diau id dii kopiisaan di Spiritu Tobitua, Kinoingan, montok sohiihinaid aiso kopupuson. Amen. 1 PAMBASAAN KOISO’ Pambasaan mantad buuk di Nehemiah 8:2-6. 8-10 Novit di Ezra ii padri ii Undang-Undang kuminaa’ doid dumbangan dii tuhun songintimung, kusai ngaavi’, tondu’ ngaavi’, om tanak ngaavi’ ii koiho nodii do mamalati’. Ontok dii tadau koiso’ do vuhan kotuu’ ii. Doiho’ id gaagana’ ii potoguvang dii Vavazaan Vaig, id dumbangan dii kusai ngaavi’ om tondu’ ngaavi’, om tanak ngaavi’ ii koiho’ nodii do mamalati’, pambasa’ no isido do mantad dii buuk do mantad nopo dii doungosuvab gisom i’ dii tangaadau; saviavi’ ii tuhun do minokinongou kozo dii Buuk do Undang-Undang. Miningkakat i Ezra i tabaa’ doid suat do id pinandat kazu ii tinoodo no haid do montok kaantakan dii. Do pikiikito kozo isido di tuhun ngaavi’ – tu’ poingkakat isido do id akaakavas ko’ ii dii tuhun ngaavi’ – ukabo’ no di Ezra ii buuk; om songian do koukab disido ii buuk ingkakat no ii tuhun ngaavi’. Dadi’ ozoo’ no di Ezra i Tuhan, i Kinoingan tabantug, om pobihido’ no dii tuhun ngaavi’ o hongon dioho’ om simba no do, ‘Amen! Amen!’; dadi’ tiduku’ no izioho’ om, pointudung doid tana’, podhoub no do id dumbangan di Tuhan. Om pambasa’ no i Ezra do mantad dii Undang-Undang di Kinoingan, miampai do pinadahin disido o lati’ dii boos om pinalati’ nogi’ disido o komozon ngaavi’ dii, mooi do kalati’ nodii ii tuhun ngaavi’ do nunu ii nabasa’. Dadi’ i Nehemiah – ii Tapantang – om i Ezra, padri’ om tabaa doid suat (om ii tuhun ngaavi’ do Levy ii minonontuduk di tuhun ngaavi’) minoboos doid dii tuhun ngaavi’ do, ‘Tadau nopo diti nga’ obitua montok di Tuhan Kinoingan diozu. Ada’ kou tongob, ada’ kou iad.’ Tu’ song-ii-iad ii tuhun ngaavi’ do maso mokinongou dii boos ngaavi’ do id Undang-Undang dii. Poboos nodii isido do, ‘Pamanau kou no, ngozo’ no diozu akano’ ii hunok, inumo’ ii anggur toomis, om paatadan no do baagi ii tuhun taiso nokosodia’. Tu’ tadau nopo diti nga’ obitua doid di Tuhan dotokou. Ada’ kou tongob: kounsikaan nopo di Tuhan nga’ koumohigan diozu.’ 2 Ii boos di Tuhan. S. Kotohuadan doid di Kinoingan. HOZOU KOSIMBAAN (HOZOU KAPAAZAAN KO-18:8-10. 15. R/Jn 6:63) S. Boos ngaavi’ Nu nopo nga’ sunduvan, oi Tuhan, om koposizon ngaavi’ ii. 1. Poinggonop ii Undang-Undang di Tuhan, mamasi vagu’ ii di koduuduvo. Kootulan nopo di Tuhan nga’ maan hansano’, manaak ii do kabaahan doid di tongohinuud. (S) 2. Pongotulan ngaavi’ nopo di Tuhan nga’ kotunud, popounsikou ngaavi’ ii do ginavo. Atahang o ponuu’ di Tuhan, manaak ii do ninavau doid di mato. (S) 3. Obitua i koo-onok doid di Tuhan, poimpasi sohiihinaid. Ponuu’ ngaavi’ nopo di Tuhan nga’ katapatan, om saviavi ii do otuhid. (S) 4. Aanangan Ko no daa dii boos ngaavi’ ii pinoboos di kabang ku, ii pomusaavan ngaavi’ di ginavo ku, kahantoi do kovosian id tokito nu, oi Tuhan, i mamamasi ku, i pampang ku! (S) 3 PAMBASAAN KODUVO Pambasaan mantad suat koiso’ di Sangti Paul doid tuhun ngaavi’ do Corinth 12:12-30 *Miaga do tinan do tuhun, tu’ sundung potuu do notoodo do ogumu’ o boogizan, nga’ posonginan i’ ii sabap saviavi’ boogizan ngaavi’ diti, sundung ogumu’, nga’ kapamadadi’ do iso’ tinan, ingkaa nogi do id di Kristus. Nongopodsu’ tokou do id dii iso’ Spiritu, Johudi ngaavi’ miaga nogi do Greek ngaavi’, tudipon ngaavi’ miaga nogi do tuhun ngaavi’ pogun, om ii-iso’ no i Spiritu do nakataak doid dotokou do inumon. Okon nogi’ ko’ toombo noopo dii boogizan togumu’ dii tinan o kointutunan dii tinan.* Nung moboos dati ii takod do, “Okonko’ hongon zou om au’ zou i’ dii poingamung di tinan,” komozon dii naku dino’ do tuminood ii do poinbaagi dii tinan? Nung moboos dati ii tohingo do, `Okonko’ mato zou, om au’ zou i’ dii poingamung di tinan’, komozon dii naku dino’ do okon nodii ko’ somboogizan di tinan ii? Nung posonginan ii tinan diozu do ii-iso’ mato no, ingkuo kou dii do koongou do oonu- onu? Nung iso’ tohingo no ii, ingkuo kou dii do kosingud do oonu-onu? Ingkaa no do, tinomod no haid di Kinoingan do pinopiamung do baagi ngaavi’ diti do id tinan. Nung mogi-aga-aga o boogizan ngaavi’ diti, ingkuo dii iti do adadi do iso’ tinan? Ingkaa no iti, do ogumu’ ii baagi nga’ ii-iso’ no o tinan. Au’ kaanu i mato do moboos doid di hongon do, `Au’ zou i’ momoguno diau,’ om au’ nogi kaanu i tuhu do moboos di takod do, `Au’ zou i’ momoguno diau.’ Hobi po dii vagu’, do ii no kozo baagi ngaavi’ dii tinan ii miaga ko’ ii tomungkang no kozo o au’ miho’ do zadaan; om ii no boogizan ngaavi’ dii tinan ii tonini no kozo o kapamantangan ii basaanan dotokou miampai kopomohizaan tagazo. Ingkaa no do ii boogizan ngaavi’ dii tinan dotokou ii au’ pinosongkuo nga’ ataandak dii id kalaalahano’ ii au’ gunoon dii boogizan ngaavi’ ii poinginomod kozo. Tinoodo no haid di Kinoingan o tinan do 4 pohoohobizonon o kapantangan doid dii boogizan ngaavi’ ii aiso do kapantangan, om do aiso nodii do pogiuvaavahan do id tinan dii, nga’ do mogisoosokodung dii o boogizan ngaavi’ dii. Nung osinduahan o iso’ boogizan, nga’ saviavi’ boogizan do ongosinduahan miampai dii. Nung oonuan do gaa’ poimbida’ o iso’ boogizan nga’ saviavi’ boogizan do kounsikou dii. *Dadi’ saviavi’ kou do tinan i’ di Kristus; nga’ toiso’-iso’ diozu do somboogizan ngaavi’ dii.* Id Eklizia nopo, nga’ pinataak no haid di Kinoingan ii koizonon kumo-iso doid apostol ngaavi’, ii kumo-duvo doid profeta ngaavi’, ii kumo-tohu doid mongingia’ ngaavi’; sumusuut dioho’, kosunduvan ngaavi’, om sumusuut dioho’ o titaak do kopomohingasan; mananakadai ngaavi’, huguan tangavasi’ ngaavi’, ii ngaavi’ mogisuvai-suvai o boos. Saviavi’ naku izioho’ do apostol, toi’ saviavi’ naku izioho’ do profeta, toi’ saviavi’ naku izioho’ do mongingia’? Saviavi naku izioho’ do kivaa do titaak do kosunduvan ngaavi’ toi’ saviavi’ do kivaa do titaak do kopomohingasan? Saviavi’ naku do moboos do boos ngaavi’ suusuvai, om saviavi’ koiho do papalati’ dii? Ii boos di Tuhan. S. Kotohuadan doid di Kinoingan. KAPAABALAN DII ABAL-TAVASI’ Lk 4:18 Alleluia, alleluia! Pinougad zou di Tuhan do mogovit dii Abal Tavasi’ kumaa’ doid di tongomosikin, do papaabal do kahapasan doid di nongokotolungku. Alleluia. 5 ABAL-TAVASI’ Pambasaan dii Abal-tavasi tobitua sinuat di Luke 1:1-4; 4:14-21 Kokito ku nopo do ogumu’ ii suvai do nokoponuat do susuzan ngaavi’ dii kinaantakan ii nangaantakan doid dotokou, om aiso i’ do nokosimban dii do mantad nunu ii nokosunud doid dagai dii nongokokito do kinaantakan ngaavi’ dii om dii mononompuan ngaavi’ dii boos, do izou do dau’, dii kopongo zou do minonoizuk do saviavi’ susuzan dii do mantad dii tinimpuunon dii, do’ nokopomusoou do monuat do iso’ susuzan touhud do montok diau, oi Theophilus, mooi do koiho’ ko daa oi Tapantang do songkuo tinopot dii kopongia’an ii notoimo nu. Jesus, miampai do kuasa’ di Spiritu id Disido, guminuhi’ doid Galilee; om kaabal no doid pototongkop do kokompungan ngaavi’ o ngaan tavasi’ Disido. Minongia’ Isido do id synagogue ngaavi’ dioho’ om naazou dioho’ Isido. Nokoikot Isido doid Nazara, ii kinogozoon Disido, om minugad Isido do id synagogue do ontok tadau sabbath miaga dii koubasanan Dau’. Miningkakat Isido do minambasa’, om potunuzo’ no dioho’ doid Disido i hiningkuman suat di profeta Isaiah. Vahado’ no Disido ii hiningkuman om kokito no Disido ii poinsuat do: “Nakataak doid Dogo’ ii Spiritu di Tuhan, tu’ noumaan zou Disido. Pinougad zou Disido do mogovit dii abal tavasi’ kumaa’ doid di tongomosikin, do papaabal do kahapasan doid di nangataan om do kokito vagu’ ii nongobohou, do papahapas di poimamangon, do papaabal dii toun kaanangan di Tuhan”. Hingkumo’ no Disido ii hiningkuman dii, om poguhio’ no Dau’ ii doid di mananakadai om iikau no. Saviavi’ ii doiho’ id synagogue 6 dii do minunsolong Disido. Dadi’ timpuun no Isido do minoboos doid dioho’ do, `Maamaso no tuhukon do tadau baino itia nokosuat do maamaso kou mokinongou.’ Ii Abal-tavasi’ di Tuhan. S. Kaazaan doid Diau, oi Tuhan za, Jesus Kristus. SAMBAYANG DO ID DII TITAAK NGAAVI’ Toimoo’ o titaak ngaavi’ dagai, oi Tuhan, sumambayang zikoi, om id kopombituahan dii ngaavi’ panaak no do kopopountung nodaa dagai ii ngaavi’ do montok kopomosizan. Maza’ di Kristus Tuhan za. Amen. PREFACE KO-III DO DII TADAU-MINGGU’ NGAAVI’ ID TIMPU’ TOOMOD Ii kopomasizan nimaan do tuhun kumaa’ doid tuhun Totootopot do kotunud om otuhid iti, kalaja’ za om kopomasizan za, tomoimo om id-nombo-noopo do manaak Diau do koponongkotohuadan ngaavi’, oi Tuhan, Tama’ tobitua, Kinoingan tavakas-kozo om aiso-kopupuson. Tu’ koiho zikoi do poinsanganu iti doid kobontugan Nu taiso gontob, do minikot Ko doid dii kapanakadazan do tuhun ngaavi’ (7) miho-apatai miampai do kokinoinganan Nu om minonguug podii montok dagai do kopomohingasan dii-sondii’ ii miho-apatai, do ii nontodonon do kootuan za adadi daa dii lahan ngaavi’ do kopomasizan, maza’ di Kristus Tuhan za. Maza’ Disido ii tinimungan do Tasab ngaavi’ do sumamba do ko-laja-an Nu om umondos id kotindapaan selajul Nu. Ii ohou ngaavi’ dagai, sumambayang zikoi, mampot nodaa dii dioho’ id 7 iso’ kopiampatan-hozuk do kaazaan tabantug, do maso zikoi mangazou: Obitua, Obitua, Obitua i Tuhan Kinoingan do………….. HOZOU KOSOMBUTAN Cf. Ps 33:6 Intong ponong-doid di Tuhan om imang no navau-kosuong; kada’ potumbazaai o voos ngaavi’ diozu do oikum-ikum. toi Jn 8:12 Izou no ii babang do di pomogunan, ka di Tuhan; isai-noopo ii tumanud Dogo’ au’ i’ mamanau id totuvong, nga’ kivaa i’ dii babang do koposizon. SAMBAYANG OPONGO KOSOMBUTAN Panaak no, sumambayang zikoi, oi Kinoingan tavakas-kozo, do monoimo dii grasia ii toombo do oviton zikoi Diau doid koposizon vagu, tomoimo zikoi nodaa do mimbantug id titaak Nu. Maza’ di Kristus Tuhan za. Amen. BALAKAT Om ii balakat di Kinoingan tavakas-kozo, i Tama’, om i Tanak, om i Spiritu Tobitua, sumondot nodaa do id diozu om tumimpoon miampai diozu sohiihinaid. Amen. 8
Enter the password to open this PDF file:
-
-
-
-
-
-
-
-
-
-
-
-