10 - 7 - 2022 ID SOMOK II BOOS DISIDO Taandakon dotokou ii sinomok di Tuhan doid dotokou tuhun ngaavi’ Dau. Isido no ii tuhun Samaria ii tavasi’ ii mikot id somok dotokou om momohingongon dotokou, popotungag dotokou doid koposizon miaga dii tinan Dau’ sondii’. HOZOU KOSUANGAN Cf. Ps 16:15 Izou do dau’ nopo nga, id kotuhidan mintong zou mai’ do voos nu; oponu’ zou mai’ miampai dii kokitanan do kobontugan nu. Ii Gloria in excelsis (Kobontugan doid di Kinoingan) booson. SAMBAYANG-TONIIBO-KOPONIMPUUNAN Oi Kinoingan, ii popokito dii ninavau do katapatan Nu doid sontob dii mugad umahau, mooi do gumuhi’nodaa izioho’doid dii lahan kotunud, onuai saviavi’ ii montok dii kotumbazaan tonudon dioho’ nga’ kountob do Kristian ngaavi’ dii grasia do mamazada’ do nunu-noopo ii okonko’ doid dii ngaan di Kristus om do minggisom sumusuut do saviavi’ dii pantangon dii. Maza’ di Tuhan za Jesus Kristus, Tanak Nu, ii mamaamasi om momolinta’ miampai -2- Diau id dii kopiisaan di Spiritu Tobitua, Kinoingan, montok sohiihinaid aiso kopupuson. S. Amen PAMBASAAN KOISO’ Pambasaan mantad di buuk do Deuteronomy 30:10-14 Poboos no i Moses doid dii tuhun ngaavi': ‘Imozoo' no ii ohou di Tuhan Kinoingan diozu, tonudon no ii ponuu' ngaavi' om kootulan ngaavi' Dau' ii nongokosuat do id dii Buuk diti Undang-undang, om koguhi' kou mai' doid di Tuhan Kinoingan diozu miampai do aavi' o ginavo om koduuduvo diozu.’ ‘Tu' iti nopo Undang-undang itia pohombuson ku doid diozu do tadau baino nga' okonko' kaahib do vinakas diozu toi' au' diozu adampot. Okonko' id Surga iti, do momusoou kou dii do, 'Isai nodii o minsavat doid surga do mogovit dii do mindau' doid dagai, mooi do oongou dagai ii om atanud dagai ii?' Okon nogi' ko' id soboong do daat ii, do momusoou kou dii do, 'Isai nodii o sumoboong diho' daat om mogovit dii gumuhi' doid dagai, mooi do oongou dagai ii om atanud dagai ii?' Au'; id somok kozo diozu ii Boos, id kabang diozu ii om id ginavo diozu do montok imozoon diozu." Ii boos di Tuhan. S. Kotohuadan doid di Kinoingan. -3- HOZOU KOSIMBAAN (Hozou-kapaazaan 68:14.17.30-31.33-34. 36-37 r.v.33) S. Iumo’ no i Tuhan, iziozu ii tangasampit, om oposizan i’ o ginavo ngaavi’ diozu. 1. Iti no o sambayang ku doid Diau, sambayang ku montok do kovosian Nu. Id koginavaan Nu tagazo, simbao' zou po, Oi Kinoingan, miampai do sakadai Nu ii au' insan do au' otuhuk: Oi Tuhan, simba no, tu' koginavaan Nu nopo nga' otohuod; id kobinsianan Nu, kisus po doid dogo' (S) 2. Montok nopo dogo', do id komosikinan om toluo nga' kakato' zou no, oi Kinoingan, dii sakadai Nu. Ozoon ku i' do hozou o ngaan di Kinoingan; bontugon ku i' do koponongkotohuadan Isido. (S) 3. Ounsikou i' ii tongomosikin do ontok kokito izioho' dii om oposizan i' ii ginavo ngaavi' ii mogium di Kinoingan'; tu' kinongoon di Tuhan ii au' ogonop om au' i' duanan ii suupu ngaavi’ Dau do id balantai ngaavi' dioho’. (S) 4. Tu' oviton i' di Kinoingan o sakadai kumaa' doid Zion om tuidongon vagu' Dau ii kakadazan ngaavi' di Judah. Sovohionon mai' dii tanak ngaavi' dii suupu ngaavi' Dau' ii; mogiigizon mai' do doiho' ii guminavo ngaavi' dii ngaan Dau'. (S) -4- PAMBASAAN KODUVO Pambasaan mantad dii suat di Sangti Paul doid di Tuhan ngaavi’ do Colossi 1:15-20 I Kristus Jesus nopo nga' ii kaagahon di Kinoingan au' okito om ii sai' do saviavi' vinangun, tu' id Disido no do navangun saviavi' konunu ngaavi’ ii id tavan om id tana': saviavi' ii okito om saviavi’ ii au' okito, Tiikoon Laja' ngaavi', Koponguasaan ngaavi', Kopomolintaan ngaavi', Kuasa ngaavi' – saviavi konunu ngaavi’ do navangun maza’ Disido om montok Disido. Poguhu i' do navangun o nuununu nopo, doiho' no haid Isido, om igitan Dau' o saviavi' konunu ngaavi do id piisaan. Do baino nopo nga' i Eklizia o tinan Disido, Isido no o huguan dii. Tu' Isido no ii Tinimpuunon, Isido no ii kumoiso' do hinodi' mantad poimpatai, mooi do Isido dii ii koiso' do id nunu noopo; tu' mimang i Kinoingan do o-ium id Disido o saviavi' kaganapan om saviavi' konunu ngaavi do piunungon maza' Disido om montok Disido, saviavi' ii id tavan om saviavi' ii id tana', dii ontok ponoodo Isido do pibabasan maza' dii kinapatazon Dau' do id salip. Ii boos di Tuhan. S. Kotohuadan doid di Kinoingan. -5- KAPAABALAN DI ABAL-TAVASI’ Jn 10:27 Alleluia, alleluia! Ii nopo kambing biri-biri' ngaavi' ii doun Dogo' nga' mokinongou do ohou Ku, ka di Tuhan, kotutun Zou dioho' om tumanud Dogo' izioho'. Alleluia! toi' cf. Jn 6:63.68 Alleluia, alleluia! Boos ngaavi' Nu nopo nga' sunduvan, oi Tuhan, om koposizon ngaavi' ii: kivaa do Diau dii abal do koposizon selajul. Alleluia! ABAL-TAVASI’ Pambasaan mantad dii Abal-tavasi’ tobitua sinuat di Luke 10:25-37 Kivaa songuhun tabaa undang-undang, ii kuminam do momuuvong di Jesus, miningkakat om minoboos doid Disido, "Oi Mongingia', nunu o mositi' maan ku do otungkusan zou nodii do koposizon selajul?" Poboos no Isido doid disido, "Nunu o poinsuat do id dii Undang- undang? Nunu o tabasa' nu do doiho?" Simba no isido do "Mositi' ginovoon nu i Tuhan Kinoingan nu do gisom aavi' o ginavo nu, gisom aavi' o koduuduvo nu, gisom aavi’ o vinakas nu, om gisom aavi' o pomusaavan nu, om ii vokon nu do miaga diau sondii'." “Nokotunud ko no do suminimba", ka di Jesus, "imang no do ingkaa om diau no do koposizon." -6- Nga' ohizab kozo o tuhun dii do monontob dau' sondii' om poboos no doid di Jesus, "Om iisai dii o vokon ku." Simba no i Jesus, "Kivaa do songuhun ii id tindahanon dau' do poundukan mantad Jerusalem kumaa' doid Jericho om avangai no do magagaau ngaavi'; onuo' no dioho' o saviavi' ii kivaa disido, bobogo' isido om pogigidu' no, minogiduan disido do modtikapatai no. Dadi' kaantakai no do kivaa songuhun padri' do minaza' ponogi' do talun-alun dii, nga' kokito nopo dau' o tuhun dii, nga' tahib no isido dii id sampaping. Ingkaa nogi' ii songuhun tuhun do Livai tu' nokotutuk do doiho' dii do nokokito disido, om tahib no do doiho' id sampaping. Nga' kokito nopo dii songuhun tuhun Samaria maso monompogunan o tuhun dii nga' noikot no isido do nosianan dii ontok kokito disido isido. Intutuk no isido dii om vongkoso' no dau' ii ganit ngaavi' disido, tinunguan do tumau om hiing anggur ii ganit ngaavi' dii. Dadi kakato' no dau' isido do pinapasakai dii sakazan dau', ovito' isido doid dii hamin tuundoongon om gompizo' no isido. Dii ontok tadau suminusuut, paganu no isido do duvo denarii om pataako' no ii doid di mintatamong dii hamin tuundoongon. 'Gompizon no iziaho', ka disido 'om balazan ku i' iziau do hobi do balanja' nu do ontok poguhian ku.' Toombo diti tohu, do tosoou nu, o nokopopointahang dau' sondii' do vokon dii tuhun nimaan avangai dii magagaau?" “Ii songuhun nosianan dau',” ka disido. Poboos no i Jesus doid disido, “Pamanau no, om maan nu no sondii' o miaga dii.” Ii Abal-tavasi’ di Tuhan. S. Kaazaan doid Diau, oi Tuhan za, Jesus Kristus. Booson ii Otumbazaan. -7- SAMBAYANG DO ID DII TITAAK NGAAVI’ Intong doid dii titaak ngaavi’ do di Eklizia, Oi Tuhan, do maso zosido sumambayang do sambayang dosido doid Diau, om panaak no do, ontok aakan dii sontob otumbazaan, mogovit nodaa do hobi po ginazo do kobituahan. Maza’ di Kristus Tuhan za. S. Amen. PREFACE VII DO DII TADAU-MINGGU’ NGAAVI’ ID TIMPU’ TOOMOD Kopomasizan maza’ dii kobingimazaan di Kristus Totootopot do kotunud om otuhid, iti kalaja’ za om kopomasizan za, tomoimo om id-nombo-noopo do manaak Diau do koponongkotohuadan ngaavi’, Oi Tuhan, Tama’ tobitua, Kinoingan tavakas-kozo om aiso-kopupuson. Tu’ gumininavo Ko kozo di pomogunan do id kosianan Nu pinougadan zikoi Diau di Mononobus, do mamaamasi miaga dagai do id saviavi’ konunu nga’ douso po, mooi do kaanu Ko guminavo id dagai do nunu ii gininavo Nu id di Tanak Nu, ii maza’ diisai o kobingimazaan do nokotonduhi’ zikoi doid sontob dino Diau do taak do, maza’ do momidouso, natagak za id au-kobingimazaan. Om ingkaa no, oi Tuhan, miampai saviavi’ dii Tasab ngaavi’ om Sangti ngaavi’, izikoi, ponogi’, nga’ manaak Diau do koponongkotohuadan ngaavi’, miaga do id kounsikaan-tagazo mangazou zikoi: Obitua, Obitua, Obitua... -8- HOZOU KOSOMBUTAN Cf. Ps 83:4-5 Ii pilit ko’ium do izonon, om ii tongkulupisau lumun montok pizak dosido: id-dabping do altaari ngaavi’ Nu, Oi Tuhan do kokuasaan-ngaavi, Laja’ ku om Kinoingan ku. Angabalakatan no izioho’ ii mogiigizon id hamin Nu, sohiihinaid humozou do kaazaan Nu. toi’ Jn 6:57 Isai-noopo ii mangakan do tonsi Ku om monginum do zaa’ Ku tumindooi id Dogo’ om Izou id dau’, ka di Tuhan. SAMBAYANG OPONGO KOSOMBUTAN Do nakapagavi’ nodii diti titaak ngaavi’, sumambayang zikoi, Oi Tuhan, do, maza’ do kaampazan za id diti mistirium, gumazo nodaa do id dagai o vaza’ ngaavi’ diti ii kapanampasi. Maza’ di Kristus Tuhan za. S. Amen. BALAKAT Om ii balakat di Kinoingan tavakas-kozo, i Tama’, om i Tanak, om i Spiritu Tobitua, sumondot nodaa do id diozu om tumimpoon miampai diozu sohiihinaid. S. Amen
Enter the password to open this PDF file:
-
-
-
-
-
-
-
-
-
-
-
-