30.01.2022 TADAU MINGGU’ KA-APAT ID TIMPU’ TOOMOD TOUN C I EKLIZIA SABAAGI DO PROFETA DI KINOINGAN Avasi’ o kinoikoto’ dotokou tu’ nohoou do Kinoingan do dumadi do profeta ngaavi’ Dau: do papakaa’ dii Boos ngaavi’ Disido doid munung dotokou om papaabal dii doid pomogunan. Nga’ aiso i’ do kokoozo’ dii titaak do kopogoohungungan doid dotokou nung aiso no do titaak do koginavaan: koginavaan kumaa’ doid pomogunan ii miaga dii di Kristus ii iso’ katahangan sundung potuu do magada’ dotokou o pomogunan. HOZOU KOSUANGAN Ps. 105:47 Tomposizo’ zikoi, Oi Tuhan Kinoingan za! Om timungo’ zikoi no mantad dii tinau’ ngaavi’, do manaak do koponongkotohuadan ngaavi’ doid ngaan tobitua Nu, om mamadadi dii do kobontugan za do mangazou Diau. SAMBAYANG-TONIIBO-KOPONIMPUUNAN Onuai zikoi no, oi Tuhan Kinoingan za, do mamantang zikoi nodaa Diau miampai aavi’ pomusaavan za, om guminavo do potitikid-tuhun id katapatan do ginavo. Maza’ di Tuhan za Jesus Kristus, Tanak Nu, ii mamaamasi om momolinta’ miampai Diau id dii kopiisaan di Spiritu Tobitua, Kinoingan, montok sohiihinaid aiso kopupuson. Amen. PAMBASAAN KOISO’ Pambasaan mantad di profeta Jeremiah 1:4-5.17-19 Id timpu' di laja' Josiah, nokoboos doid dogo’ ii boos di Tuhan do, “Poguhu i’ do notoodo Ku iziau do id pagaganakan noihaan Ku no iziau; poguhu i’ do nokohivan ko nopihi’ Ku no iziau; nopihi Ku no iziau sabaagi do profeta doid dii tinau’ ngaavi’. Dadi’ do baino imang no tounda’ do pakalaja’. Ingkakat no om poihoon no izioho’ dii sontob ponuu’an Ku diau. Ada’ kotumpohok do id dumbangan dioho’, toi’ id dumbangan dioho tumpohokon Ku i’ iziau. Izou, nopo do dau’, nga’ tadau baino dodizon Ku i’ iziau do iso’ kakadazan tagazo ii nokuta’, toigi tagazo bosi’, om tobon tambaga’ ii humavan do saviavi’ diti tinau': ii laja’ ngaavi’ di Judah, ii tanak laja’ ngaavi’ dii, ii padri’ ngaavi’ om ii momoomogun ngaavi’ dii. Monongkiimang i’ diau izioho’ nga’ au’ i’ mai’ kabaga diau, tu’ miampai Zou diau do papahapas diau – i Tuhan iti moboos”. Ii boos di Tuhan. S. Kotohuadan doid di Kinoingan. -2- HOZOU KOSIMBAAN (HOZOU KAPAAZAAN KO-70:1-6. 15. 17) S. Pobooson do munung ku o kasakadazan Nu. 1. Id Diau no, Oi Tuhan, o pokiumohigan ku; ada’ zou no poikuukumo' po. Id kotuhidan Nu tomposizo’ zou no, pagabaso’ zou no: kinongoo’ zou no om tomposizo’ zou no. (S) 2. Dadi no do pampang ii susuton ku do mokiumohig, ii kuta’ tavakas do manampasi dogo’; tu’ Iziau no i pampang ku, i kuta’ ku. Pahapaso’ zou no do mantad hongon di tangalaat. (S) 3. Iziau no, oi Tuhan, i kahansanan ku, i kotumbazaan ku, oi Tuhan, do mantad po di omuhok zou po. Id Diau no o sinondion ku do mantad po dii kohodi’ zou, mantad dii doiho’ zou po id pagaganakan di ina’ ku do Iziau no haid i sakadai ku. (S) 4. Pobooson i’ do munung ku o kotuhidan Nu om do tikid tadau ii sakadai Nu. Oi Kinoingan, no-ia’ zou Diau do mantad di omuhok zou po om kakal zou po do papaabal di koimazaan Nu ngaavi. (S) PAMBASAAN KODUVO Pambasaan mantad suat koiso’ di Sangti Paul doid tuhun ngaavi’ do Corinth 12:31-13:13 Imang no hizab dii titaak ngaavi’ takaakavas po. Om pokitonon ku iziozu dii lahan ii avaavaasi’ po do mantad toombo noopo diho’. -3- Nung naaviavi’ ku o kabaahan do mobooboos miaga do tuhun ngaavi’ toi’ tasab ngaavi’, nga’ moboos zou i’ ma miampai aiso do koginavaan, nga’ miaga zou no dii tagung do motung-hotung toi’ ii tababang do maang-gaang. Nung nakaambit zou do titaak do kopogoohungungan, kalati’ do saviavi’ dii katapatan ii aahom o komozon, om koiho do saviavi’, om nung aiso nodii do uangon do kotumbazaan ku, do monginsi’ do nuhu ngaavi’ takavas, nga’ aiso i’ ma do koginavaan ku, nga’ aiso i’ dogo’. Nung potohuodon ku o saviavi’ ii doun dogo’, toiso’-iso’ dii, om nung tinan ku po nga’ pataakon ku dioho’ do maan tutudai, nga’ aiso i’ ma do koginavaan ku, nga’ au' kopogovit ii do nuununu kovosian doid dogo'. *Koginavaan nopo nga’ tomoimo do kotoboi om otohuod; au’ i’ insan ii do apapahadan; au’ i’ insan pongkiindaandama’ toi’ ponong-kudaadau’ o koginavaan; au’ i’ insan ii do avagkang toi’ osingot; au’ i’ ohimpotukan ii, om au’ nogi’ obinhodong. Au’ i’ ounsikou do id douso ngaavi’ dovokon o koginavaan nga’ aanangan do id dii katapatan; pointounda’ tomoimo ii do popohiong, do otumbazaan, do humansan om do tumoboi doid nunu noopo ii mikot. Au’ i’ opupusan o koginavaan. Nga’ nung kivaa do titaak ngaavi’ do kopogoohungungan, nga’ koikot i’ o timpu’ do mositi’ tumagak ngaavi’ ii; toi’ ko’ titaak do boos ngaavi’ – au’ i’ mongompusan ii; om toihaan – tu’ iho,’ nga,’ koikot nogi’ i’ o timpu’ do mositi’ opupusan. Tu’ au’ i’ poinggonop o toihaan dotokou om au’ i’ poinggonop o kopogoohungungan dotokou; nga’ koikot nopo ii poinggonop, tumagak nodii ii au’ ngaavi’ poinggonop. Ontok nopo dii tanak zou po, nga’ noubas zou do moboos miaga do tanak, om momusoou miaga do tanak, om monongkiuva’ miaga’ do tanak, nga’ do baino tu’ nosukod zou nodii, zadaan ku ii kalaalahano’ ngaavi’ do doun tanak. Tokito nopo dotokou do -4- baino nga’ ii sangai maan-vaan do id soomin; nga’ kopikito tokou i’ mai’ do id pituubungan. Ii nopo toihaan ku do baino nga’ au’ i’ poinggonop; nga’ koiho zou i’ mai’ kozo do miaga dogo’ do noihaan kozo. Poniboon nopo nga’, kivaa do tohu ii otogui: kotumbazaan, kahansanan om koginavaan; om ii nopo tagazo no kozo diho’ nga’ koginavaan. Ii boos di Tuhan.* S. Kotohuadan doid di Kinoingan. Montok pambasaan toniinibo’, basaon nazatan boos 4-13. Id piahatan do tanda* KAPAABALAN DII ABAL-TAVASI’ Jn 14:5 Alleluia, alleluia! Izou no ii Lahan, ii Katapatan om ii Koposizon; ka di Tuhan; Aiso i’ do koongoi doid di Ama’ ngau’ maamaza’ no Dogo’. Alleluia! toi’ Lk 4:18 Alleluia, alleluia! Pinougad zou di Tuhan do mogovit dii Abal Tavasi’ doid di tongomosikin, do papaabal do kahapasan doid di nongokotolungku. Alleluia! ABAL-TAVASI’ Pambasaan mantad dii Abal-tavasi’ tobitua sinuat di Luke 4:21-30 Timpuun no i Jesus do minoboos doid dioho’ do doiho’ id synagogue do, “Maamaso no otuhuk do baabaino iti -5- nongokosuat do maamaso kou ponogi’ do mokinongou.” Om saviavi’ i doiho’ dii do pinopokotopot Disido, om nongoimazaan izioho’ dii boos tangavasi’ ii minikot mantad munung Disido. Poboos no izioho’ do, “Iti no bo ii tanak di Joseph dii, ‘koni’?” Nga’ simba no Isido do, “Mositi’ nopo do oiton diozu doid Dogo’ ii boobooson do, 'Oi mongungusap, hingasai po o Diau sondii’ om biisaan Zou diozu do, ‘Nongokoongou zikoi dii nangaantakan doiho’ id Capernaum; maai no do doiti’ id kampung Nu sondii’ ii nimaan Nu ngaavi’ do doiho’,” Om tihombus no Isido do minoboos do, “Poihoon Ku iziozu totootopot, aiso i’ do profeta do otoimo do id pogun dau’ sondii’. “Ogumu’ haid o tondu’ nangapatazan do sansavo do id Israel, totootopot no kozo, di ontok timpu’ di Elijah, di ontok poinhantop o tavan do tohu toun om onom vuhan hinaid om noontok do pononhousan o id pototongkop do tana’ dii; nga’ au’ i’ pinougad i Ilijah doid tongoiso’ dioho’: pinougad isido doid songuhun tondu’ napatazan do sansavo do doiho’ id Zarephath, iso’ kakadazan id Sidon. Om di ontok timpu’ di profeta Elisha ogumu’ o tuhun ginomuon id Israel, nga’ aiso tongosonguhun dioho’ do nohingasan. Ii-ii no tuhun do pogun Syaria, i Naaman.” Koongou nopo dioho’ iti nga’ noikot no do nangaasang ii sontob doiho’ id synagogue. Sihok no izioho’ do miningkakat om pinsugagangai no dioho’ Isido do pinapahabus dii kakadazan; om ovito’ no dioho’ Isido do doiho’ id gotok dii nuhu ii kinosumpakon dii kakadazan dioho’, kigiiginavo do papaatu’ daa Disido do doiho’ id ungib, nga’ sisip no Isido dii ginumuan do tuhun om pamanau no do minogidu’. Ii Abal-tavasi’ di Tuhan.* S. Kaazaan doid Diau, oi Tuhan za, Jesus Kristus. -6- Sambayangon ii Otumbazaan. SAMBAYANG DO ID DII TITAAK NGAAVI’ Oi Tuhan, oviton za doid altari Nu iti titaak ngaavi’ do kotompuanan za: kounsikou no do monoimo diti ngaavi’, sumambayang zikoi, om vohio’ no iti ngaavi’ doid dii Sakramintum do koponobusan za. Maza’ di Kristus Tuhan za. Amen PREFACE KO-I DO DII TADAU-MINGGU’ NGAAVI’ ID TIMPU’ TOOMOD Ii Misterium do Paska om ii Tuhun ngaavi’ di Kinoingan Totootopot do kotunud om otuhid iti, kalaja’ za om kopomasizan za, Tomoimo om id-nombo-noopo do manaak Diau do koponongkotohuadan ngaavi’, oi Tuhan, Tama’ tobitua, Kinoingan tavakas-kozo om aiso-kopupuson, maza’ di Kristus Tuhan za. Tu’ maza’ di Misterium do Paska Disido, nopongo Disido ii koimaan koimazaan-kozo, ii maza’ dii no do nakapapagabas Isido dagai do mantad dii poku’ do douso om kapatazon, momohoou dagai doid dii kobontugan do baabaino pungaanan nodii do tinaau’ nopihi’, kopadrian poinlaja’, tinaau’ tobitua, tuhun ngaavi’ montok kosongonuan Nu sondii’, do papaabal id-nombo-noopo dii kalaja’ ngaavi’ Nu tindama’, tu’ nokopomohoou ko dagai do humabus do totuvong kumaa’ doid ninavau Nu sondii’ koimazaan. Om ingkaa no, miampai do Tasab ngaavi’ om Huguan-tasab ngaavi’, miampai Tiikoon-laja’ ngaavi’ om Pomolintaan ngaavi’, om miampai saviavi’ dii mogiigizon-ngaavi-id-surga -7- om Kuasa’ ngaavi’ do surga, humozou zikoi dii hozou kapaazaan do kobontugan Nu, om miampai-aiso-kopupuson mangazou zikoi: Obitua, Obitua, Obitua i Tuhan Kinoingan do…….. HOZOU KOSOMBUTAN Cf. Ps 30:17-18 Pababango’ ino voos Nu doid di suupu Nu. Tomposizo’ zou id koginavaan Nu tobinsianan. Oi Tuhan, kada zou no potuutumbazaai po doid koikuman, tu’ momohoou zou Diau. toi’ Mt 5:3-4 Abalakatan no ii ongosiibo’ o kogiiginovoo’, tu’ dioho’ no dii Pomolintaan do Surga. Abalakatan no ii tongohuud, tu’ kasanganu mai’ izioho’ dii tana’. SAMBAYANG OPONGO KOSOMBUTAN Nakaakan diti titaak ngaavi’ kopomosizan, sumambayang zikoi, Oi Tuhan, do maza’ diti sakadai doid kopomosizan selajul gumumu’ nodaa o kotumbazaan totopot. Maza’ di Kristus Tuhan za. Amen. BALAKAT Om ii balakat di Kinoingan tavakas-kozo, i Tama’, om i Tanak, om i Spiritu Tobitua, sumondot nodaa do id diozu om tumimpoon miampai diozu sohiihinaid. Amen. -8-
Enter the password to open this PDF file:
-
-
-
-
-
-
-
-
-
-
-
-